Monday, September 17, 2012

Валс

Помеѓу моите чекори и твоите стапки -
густа магла од туѓи здивови,
огорчени, осамени, завидливи,
туѓи погледи со остри заби насмеани.

Помеѓу моите чекори и твоите стапки -
маѓепсан круг од прегратки,
од мириси, од ритмови.

Помеѓу моите чекори и твоите стапки  -
во недоглед се множат стапалки.
Ако забрзам - се оддалечуваш,
ако застанам - се приближуваш.
Ете си, на дофат од стапалава,
но знам, ако те стапнам ќе исчезнеш...

Помеѓу моите чекори и твоите стапки
остана само ветрот да свири некој валс,
и неколку суви лисја
да танцуваат немо, без глас.

No comments:

Post a Comment